Abubishr

بصراحة الموضوع شيق وجميل جدا لكني شايف فيه عند وتحدي وتكرار مالوش داعي ولو قعدت أفنط الكلام اللي في السبع صفحات حيكونوا تلات تصنيفات ناس بتقول ده علم وله اثباتاته وله أساسته .. ويصيب ويخيب وناس تقول ده فشنك .. ومالوش صلة بالعلم .. ورغي متل كلام خالتي بهانه وناس بتقول حرام الكلام ده .. وما يصحش نتكلم بحاجات زي دي .. والغريب واحد من دول بيجيب آيات تاكد كلامه والتاني من دولم يجيب آيات تأكد كلامه خلاص يا عم قلت اللي عندك يا تجيب حاجة جديدة يا تتفرج وتشوف حيحصل إيه المسألة موش عركة في سوق الخضار ولا سواطير في المدبح ولا غالب ولا مغلوب وأنا متأكد انه مفيش حد غير أيه من الجماعة اللي بيتكلموا لأنه موش مهم الواحد يغير رأيه أو يقتنع اطلاقاً المسألة ببساطه كل واحد يتعرف على طريقة التاني يعني إيه؟ يعني الواحد يجيب الأدله اللي عنده وخلاص ويقول الاساسات اللي بيتبعها صدقوني حتى الاتنين الحبايب اللي عايشين طول عمرهم ممكن يختلفوا دي سنة الحياة وده رأيي قبلتوه الحمد لله ما قبلتوه .. ما حصلش حاجة

سعيدة يا حضرات الأولة بسم الله والتانية موسى نبي عيسى نبي محمد نبي .. وكل مين له نبي يصلي عليه التالتة محسوبكم غاوي تنجيم .. هواية على الماشي .. وموش باسترزق منه بالذات اللي سموه العرب علم المسائل يعني سؤال .. ورد غطاه وبالانجلزي بيقولو هوراري .. ماخود من ساعة لكن يبنطقوا حرف الإتش ولما واحد من صحابي بيسألني باديله جواب مفصل لكن هنا حيكون الجواب صغنن وسريع الرابعة موش عاوز وجع دماغ .. اللي عاجبه يتفضل واللي موش عاجبه ما يغلبش حاله واللي أوله شرط .. اخرته سلامة استبينا!!!!!!!!!!!؟؟؟؟؟؟؟؟؟؟؟؟؟؟؟ الخامسة معلهش .. سامحوني عالكتابة باللهجة المصرية لأن سنوات الغربة دشدشت اللغة الفصحى .. وموش عايز اكتب بيها والبخ ومن بركات ربنا غن اللهجة المصرية مفهومه عند كتير من الناس نخش في الموضوع: المسائل بكل بساطة بعد السؤال ما يتطرح .. ويفهمه المنجماتي يروح عامل الشارت اللي هو الخريطة السماوية للزمان والمكان زي شارت الولادة بالضبط .. لكنه شارت ولادة السؤال ويروح باصص على الطالع اللي هنا بيمثل صاحب السؤال ويحدد المنزل بتاع السؤال والكوكب الحاكم إذا فيه لقاء إيجابي بينهم يبقى الجواب نعم وإذا ما فيش يبقى الجواب لا لكن ما تفتكرش الموضوع بالبساطة دي في عوامل كتير ودي بياخدها المنجماتي عشان يطلع بأقرب إجابة إذا قدرت اتكلم بشوية تفاصيل عن الهوراري موش حأتأخر فيه كام حاجة مهمة: قد ما يكون السؤال محدد .. يكون أفضل وكمان اللي بيسأل لازم يكون صادق وجاد في سؤاله وأحياناً الشارت بيفقس اللي موش صادق مثال واحد صاحبي سألني أنا مترشح اخد بوست محترم في الشغل .. يا ترى ح يحصل .. والا بلاش احلام ملونة سلامات يا حبايب